স্থাপত্যবিদ্যা

সহজ ভাষাত ক’বলৈ গ’লে বিভিন্ন অট্টালিকা, ঘৰ, কাৰ্যালয় আদি নিৰ্মাণ কৰাৰ আগতে যিজনে তাৰ ডিজাইন আদি প্ৰস্তুত কৰে তেৱেঁই হৈছে স্থাপত্যবিদ বা Architect। আনহাতে এই স্থাপত্য শিল্পৰ বিষয়ে বহলভাৱে অধ্যয়ন কৰা বিষয়টোৱেই হৈছে স্থাপত্যবিদ্যা বা Architect।স্থাপত্যবিদসকলে কেৱল যে অট্টালিকাই নহয়, একোখন চহৰৰ পৰিকল্পনাও কৰে। তেওঁলোকে ষ্টেডিয়াম, পাৰ্ক আদিৰো ডিজাইন কৰে। একোজন স্থাপত্যবিদে গ্ৰাহকৰ প্ৰয়োজন অনুসৰি ঘৰৰ ডিজাইন কৰাৰ লগতে কামৰ আৰম্ভণিৰ পৰা শেষ পৰ্যন্ত নিৰীক্ষণ কৰা দেখা যায়। একোজন স্থাপত্যবিদে Urban Designing, Regional Planning, Architectural Conservation, Landscape Architecture আদি বিষয়তো কাম কৰা দেখা যায়।

এজন স্থাপত্যবিদ হ’বলৈ হ’লে ছবি অঁকা বা গণিত আৰু বুৰঞ্জী আদি বিষয়ত ৰুচি থাকিলে সুবিধা হয়। ইয়াৰ উপৰি বৰ্তমান সময়ত সকলো স্থাপত্যবিদ্যাৰ কাম কম্পিউটাৰতে কৰাৰ হেতু Auto CAD কে মুখ্য কৰি কিছু কম্পিউটাৰৰ কাম জনাটো জৰুৰী। ভাৰতৰ বিভিন্ন চৰকাৰী-বেচৰকাৰী শিক্ষা প্ৰতিষ্ঠানত স্থাপত্যবিদ্যা বিষয়ত স্নাতক আৰু উচ্চ শিক্ষা গ্ৰহণৰ ব্যৱস্থা আছে। স্নাতক মহলাত নামভৰ্তিৰ বাবে আবেদনকাৰীসকল গণিত, ৰসায়ন আৰু পদাৰ্থবিজ্ঞানসহ উচ্চতৰ মাধ্যমিক উত্তীৰ্ণ হোৱাটো বাঞ্ছনীয়। একোগৰাকী স্থাপত্যবিদে চৰকাৰী বা বেচৰকাৰী চাকৰিত নিয়োজিত হোৱাৰ উপৰি নিজাকৈ স্বাধীনভাৱেও কাম কৰিব পৰাৰ যথেষ্ট সুবিধা আছে।