ডায়েটিচিয়ান

সাধাৰণ ভাষাত ক’ব পাৰি যে আমাক শুদ্ধ ৰূপত খাদ্য খোৱাৰ পৰামৰ্শ দিয়া বিশেষজ্ঞজনেই হৈছে ডায়েটিচিয়ান। ডায়েটিচিয়ান এজনৰ প্ৰধান কাম হৈছে খাদ্যাভ্যাসৰ জৰিয়তে সুস্বাস্থ্য কেনেদৰে গঢ়িব পাৰি তাৰ ওপৰত অধ্যয়ন কৰি একোজন ব্যক্তিৰ ব্যক্তিগত খাদ্যতালিকাৰ পৰামৰ্শ দিয়া। তাৰ ভিতৰত খাদ্য খোৱা অভ্যাস, খাদ্যৰ সময়, খাদ্যৰ পৰিমাণ, খাদ্যৰ বাছনি, ইয়াৰ ৰন্ধন আদি সকলো সোমাই থাকে। ডায়েটিচিয়ান একোজনে সাধাৰণতে বিভিন্ন হস্পিটেল, খাদ্য সম্পৰ্কীয় প্ৰতিষ্ঠান, খাদ্য প্ৰস্তুত কোম্পেনী আদিত নিয়োজিত হোৱা দেখা যায়। তেওঁলোকে বিভিন্ন হোটেল, খাদ্য গৱেষণা তথা প্ৰস্তুত কৰা প্ৰতিষ্ঠান, চৰকাৰী স্বাস্থ্য বিভাগ আদিৰ উপৰিও এই বিষয়ত উচ্চ শিক্ষা লাভ কৰাসকলে এই বিষয়ৰ শিক্ষক হিচাপে নিয়োজিত হোৱাও দেখা যায়। এই বিষয়ত নিজৰ কেৰিয়াৰ গঢ়িব খোজাজনৰ শৈক্ষিক অৰ্হতাখিনি থকাৰ উপৰি তেওঁৰ খাদ্যৰ প্ৰতি আগ্ৰহ, সুন্দৰভাৱে কোনো কথা বুজাব পৰা দক্ষতা, ধৈৰ্য, পৰিকল্পিতভাৱে কাম কৰিব পৰা, গৱেষণাৰ সময়ত ধৈৰ্যসহকাৰে কাম কৰিব পৰা গুণখিনিও থাকিব লাগিব।

ডায়েটিচিয়ান হ’ব খোজাসকলে পদাৰ্থবিজ্ঞান,ৰসায়নবিজ্ঞান, জীৱবিজ্ঞান আৰু গাৰ্হস্থ্যবিজ্ঞানসহ উচ্চতৰ মাধ্যমিক উত্তীৰ্ণ হোৱাৰ পাছত Nutrition, Home Scienceবা Food Science/Technologyত স্নাতক তথা স্নাতকোত্তৰ ডিগ্ৰী কৰিব পাৰে। স্নাতক ডিগ্ৰী গ্ৰহণ কৰাৰ পাছত ইচ্ছুক ছাত্ৰ-ছাত্ৰীয়ে Dietetics and  Public Health Nutrition (DDPHN)ৰ এবছৰীয়া স্নাতকোত্তৰ ডিপ্লমা নাইবা Food and Nutrition,Clinical Nutrition and Dietetics,Food Service Management and Dietetics বা Food Science and Nutritionৰ দুবছৰীয়া স্নাতকোত্তৰ ডিগ্ৰী গ্ৰহণ কৰিব পাৰে।