চেৰামিক ইঞ্জিনিয়াৰিং

চেৰামিক শব্দৰ অৰ্থ হৈছে মৃৎশিল্প। চেৰামিক ইঞ্জিনিয়াৰিং হৈছে মেটাৰিয়েল ইঞ্জিনিয়াৰিঙৰ এটা শাখা। ইয়াত চেৰামিক বা পোৰামাটিৰ বিভিন্ন সামগ্ৰীৰ ডিজাইনিং, উৎপাদন, ব্যৱহাৰ আদি বিষয়বোৰৰ বৈজ্ঞানিকভাৱে অধ্যয়ন কৰা হয়। বৰ্তমান সময়ত চেৰামিক উদ্যোগটো বহু বিলিয়ন ডলাৰৰ উদ্যোগ। সেইবাবে এই উদ্যোগটোত নিয়োজিত হ’ব পৰা থলো যথেষ্ট আছে। এই বিষয়ৰ শিক্ষাৰে শিক্ষিত একোজন প্ৰাৰ্থীয়ে বিভিন্ন চেৰামিক উদ্যোগত Technical Consultant,Project Supervisor,Ceramic Engineer আদি হিচাপে নিযুক্ত হ’ব পাৰে। ইয়াৰ উপৰি আন কিছু কিছু চৰকাৰী-বেচৰকাৰী খণ্ডতো তেওঁলোক নিযুক্ত হ’ব পৰা সুবিধা আছে। একোজন চেৰামিক ইঞ্জিনিয়াৰ এই বিষয়ৰ ডিগ্ৰীধাৰী হোৱাৰ লগতে ব্যক্তিগতভাৱে তেওঁ বিশ্লেষণাত্মক, সমস্যা সমাধান কৰিব পৰা, সুন্দৰকৈ কোনো কথা উপস্থাপন কৰিব পৰা আদি গুণৰ অধিকাৰী হ’ব লাগিব। এই বিষয়ত কেৰিয়াৰ আৰম্ভ কৰিব বিচৰা প্ৰাৰ্থীয়ে চেৰামিক টেকন’লজিত স্নাতক ডিগ্ৰী গ্ৰহণ কৰিব পাৰে। স্নাতক ডিগ্ৰীত নামভৰ্তিৰ বাব অৰ্হতা পদাৰ্থবিজ্ঞান, ৰসায়নবিজ্ঞান আৰু গণিতসহ উচ্চতৰ মাধ্যমিক উত্তীৰ্ণ হ’ব লাগিব। ভাৰতৰ বিভিন্ন বিশ্ববিদ্যালয়ে এই বিষয়ত স্নাতকোত্তৰ তথা পি.এইচ.ডি. কৰিব পৰা সুবিধাও আগবঢ়াইছে।