এক কথাত ক’বলৈ গ’লে এই তিনিটা গুণৰ অধিকাৰী এজনে কেৰিয়াৰ নিৰ্বাচনত নিশ্চয়কৈ সফলতা লাভ কৰিব পাৰিব৷ ইয়াতে প্ৰশ্ন হয় নিজকে আপুনি কিদৰে মূল্যায়ন কৰিব? নিজৰ ব্যক্তিগত আগ্ৰহ আৰু দক্ষতাক গুৰুত্ব দিয়ক৷ লক্ষ্য ৰাখিব যাতে আপুনি নিজৰ দক্ষতা অবিহনে আনক অনুসৰণ নকৰে৷ আনক অনুসৰণ কৰাৰ আগতে এবাৰ ভাবি চাব অথবা নিজকে জুকিয়াই চাব৷ আপোনাৰ এটা সিদ্ধান্তৰ বাবে যাতে গোটেই জীৱন অনুতাপ কৰিব নালাগে তাৰ প্ৰতি লক্ষ্য ৰাখিব৷ যিটো দিশত আগবাঢ়িলে আপুনি ভাবে যে আপুনি সফল হ’ব পাৰিব সেই দিশতহে গুৰুত্ব দিয়ক দেখিব আপুনি সেই নিৰ্দিষ্ট দিশটোও সুন্দৰ প্ৰদৰ্শন আগবঢ়াব পাৰিছে৷ অৱশ্যে কেৰিয়াৰ নিৰ্বাচনৰ ক্ষেত্ৰত কেৱল দক্ষতা আৰু আগ্ৰহৰ উপৰিও প্ৰয়োজন হোৱা আন এক গুণ হ’ল সঠিক পৰিকল্পনা, যাৰ অবিহনে কোনো লক্ষ্যত উপনীত হোৱাটো নিশ্চয় কঠিন হৈ পৰিব৷ পৰিকল্পনাৰ ক্ষেত্ৰত অৱশ্যেই আপুনি পৰিয়াল অথবা শিক্ষাগুৰুৰ মতামত ল’ব পাৰে৷ কাৰণ এজন শিক্ষাৰ্থীৰ জীৱনত পিতৃ-মাতৃ আৰু শিক্ষাগুৰুসকলে এক গুৰুত্বপূৰ্ণ ভূমিকা পালন কৰে৷ কেতিয়াবা এনে হোৱাও দেখা যায় যে নিজৰ ল’ৰা-ছোৱালীতকৈ পিতৃ-মাতৃয়েহে তেওঁলোকৰ আগ্ৰহৰ প্ৰতি অত্যধিকভাৱে জ্ঞাত৷ এক সফল কেৰিয়াৰৰ অধিকাৰী হ’বলৈ হ’লে মই ভাবো এজন শিক্ষাৰ্থীয়ে দশম শ্ৰেণী অথবা উচ্ছতৰ মাধ্যমিক পৰ্যায়ৰপৰাই পৰিকল্পনা কৰিব লাগে৷ যেনে উচ্ছতৰ মাধ্যমিকৰ পাছত কেৰিয়াৰ সম্বন্ধীয় পাঠ্যক্ৰম গ্ৰহণ কৰিব নে সাধাৰণভাবেই কলা, বিজ্ঞান নে বাণিজ্য শাখাত নামভৰ্তি কৰিব৷ সাধাৰণতেই দেখা যায় যে দেখাক দেখি বহুতেই বিজ্ঞান শাখাত নামভৰ্তি কৰিব বিচাৰে পাছত এনে ভুলত অনুতাপ কৰাও দেখা যায় বহুতক৷