আইনবিষয়ক অধ্যয়ন বুলি ক’লে সাধাৰণতে বহুতেই ইয়াক কেৱল ওকালতিৰ লগত জড়িত এক বিষয় বুলিয়েই ভাবে৷ আগতে আইন বুলি ক’লে মাত্ৰ ন্যায়ালয় আৰু কিছু পৰিমাণে প্ৰশাসনিক দিশৰ লগত জড়িত এক বিষয় হিচাপেই ধৰা হৈছিল৷ কিন্তু বৰ্তমান এই দিশত বিভিন্ন পৰিৱৰ্তন দেখা গৈছে৷ বৰ্তমান বিভিন্ন উদ্যোগ, মিডিয়া, ইনফৰমেচন টেকন’লজি আদি বিভিন্ন শিতানত আইনৰ ডিগ্ৰীধাৰীসকল নিয়োজিত হোৱা দেখা যায়৷ আইন বিষয় অধ্যয়ন বুলিলে বহুতেই ইয়াক কেৱল স্নাতক ডিগ্ৰীতেই (LLB)সীমাবদ্ধ ৰাখে৷ এই বিষয়টোৰ ক্ষেত্ৰতো উচ্চশিক্ষাৰ বহু সুবিধা আছে, যাৰ জৰিয়তে ছাত্ৰ-ছাত্ৰীসকলে এক সুন্দৰ কেৰিয়াৰ গঢ়িব পাৰে৷ আইন বিষয়ত যিকোনো উচ্চশিক্ষা গ্ৰহণ কৰিবলৈ হ’লে প্ৰথমে ইয়াৰ স্নাতক ডিগ্ৰী সম্পূৰ্ণ কৰিব লাগিব৷ এই স্নাতক ডিগ্ৰীৰ পাঠ্যক্ৰম কিছুমান তিনি বছৰীয়া আৰু কিছুমান শিক্ষানুষ্ঠানত পাঁচ বছৰীয়া৷ তিনি বছৰীয়া আইনৰ স্নাতক ডিগ্ৰীৰ বাবে অৰ্হতা যিকোনো স্নাতক ডিগ্ৰীধাৰী (B.A., B.Sc., B.Com)হ’ব লাগে আৰু পাঁচ বছৰীয়া পাঠ্যক্ৰমৰ বাবে উচ্চতৰ মাধ্যমিক উত্তীৰ্ণ হোৱাটো দৰকাৰ৷