মানুহৰ জীৱন - যাপন প্ৰক্ৰিয়াত কৃষিৰ এক গুৰুত্বপূৰ্ণ অৱদান আছে। কৃষিৰ প্রয়োজনীয়তা সকলো মানুহৰে আছে; লাগিলে সেয়া পৰোক্ষভাৱে হওক বা প্ৰত্যক্ষভাৱে হওক। ভাৰততো কৃষি ক্ষেত্ৰখনৰ গুৰুত্ব অপৰিসীম; যিহেতু ভাৰত হৈছে এখন কৃষিভিত্তিক দেশ। দেশৰ অৰ্থনৈতিক বিকাশৰ ক্ষেত্ৰতো কৃষিয়ে গুৰুত্বপূৰ্ণ অৱদান আগবঢ়াইছে। কৃষিৰ সৈতে বিভিন্ন বিষয় জড়িত হৈ আছে, যাৰ ভিতৰত উল্লেখযোগ্য এক বিষয় হৈছে - কৃষি অৰ্থনীতি। এই কৃষি ভিত্তিক অৰ্থনীতিয়ে কৃষিৰ ব্যৱসায়িক ক্ষেত্ৰখনৰ অধ্যয়ন কৰে। ই খাদ্য উৎপাদনৰ উপাদানসমূহ আৰু ইয়াৰ বাবে প্ৰয়োজনীয় পৰিকল্পনা গ্ৰহণ কৰে। এই ক্ষেত্ৰখনৰ সৈতে জড়িত বিশেষজ্ঞসকলক কৃষি অৰ্থনীতিবিদ বুলি কোৱা হয়। তেওঁলোকে উৎপাদনকাৰী প্ৰতিষ্ঠান আৰু বিক্ৰী প্ৰতিষ্ঠানসমূহৰ মাজত যোগসূত্ৰ স্থাপন কৰে। শেহতীয়াকৈ কেৰিয়াৰ হিচাপেও এই ক্ষেত্ৰখনৰ চাহিদা বৃদ্ধি পাব ধৰিছে। বহু শিক্ষাৰ্থীয়ে এই ক্ষেত্ৰখনেকে নিজৰ কেৰিয়াৰৰ ক্ষেত্ৰ হিচাপে গ্ৰহণ কৰিছে।